12 فبراير.. أول يوم حرية من قلب ميدان التحرير

بعد خطاب تنحى الرئيس، الناس كلها نزلت الشارع تعبر عن فرحتها.. منهم من احتفل بسماع الأغانى الوطنية، ومنهم من كان احتفل بالدعاء والصلاة، منهم من احتفل بتنظيف الميدان والشوارع المجاورة، ومنهم من كان احتفل برسم صور تعبيرية وكاريكاتورية، ومنهم من كان يحتفل مع أرواح الشهداء، فيقرأون لهم الفاتحة ويكتبون أسماءهم على لوحة كبيرة تحتوى أسماء 200 شهيد على الأقل..

قابلنا عم حسن عبد الرحيم، عامل نظافة، وكان راكب عربية "الهيئة العامة لنظافة وتجميل القاهرة"، عم ياسر قال لنا "الحمد لله إننا انتقلنا من عهد مظلم إلى عهد مليان نور وحرية وكرامة، ومن البداية كنّا من مؤيدى الثورة"، وعن الخطوة القادمة اللي لازم ياخدها الشعب قال "لازم مطالب الشعب تتحقق كاملة فى حل مجلس "التزوير" وليس مجلسى الشعب والشورى، حتى يحكم الشعب نفسه"، وعن رأيه فى شباب الثورة، قال "شكرا إنكم حققتم هذا النصر ولكن المرحلة المقبلة أشد خطورة وصعوبة من المرحلة السابقة، خليكوا بنفس الروح والتعاون فى كل مجالات العمل، لأن ده هيكون بداية الثورة ونقطف ثمارها من الكرامة والعزة التي فقدنها كثيرًا".

وبعد عم حسن، قابلنا الطفلة سلمى اللي في 6 ابتدائي، وقالت لنا "أنا حاسة إنى فرحانة لأن خلاص مش هيكون فيه سرقة أو فلوس ناس بتتاخد ظلم". شفنا عم إبراهيم اللي عنده 60 سنة، كان قاعد في وسط الميدان بيبيع أعلام مصر، قال لنا إنه هنا فى الميدان بيسترزق عشان أولاده، وكان أغلب كلامه مصحوب بكلمة الحمد لله، و "إن شاء الله العملية تتصلح".

وقبل المغرب بشوية لقينا زرعة كبيرة فى طريق مخيمات الميدان، فى الأول افتكرناها من أجل تزيين الميدان فقط، ولكن بعد ما اتكلمنا مع صاحبها، أحمد عادلى، قال لنا حاجه تانية خالص، "أنا لقيت الزرعة دى فى مكان حوالين الميدان فى وسط مجارى، فهل الأفضل إنها تبوظ وتترمى، ولا ننظفها ونحطها عند صور الشهداء؟" وعن الأسباب اللي دفعته لده، قال إن "مفيش محل ورد قريب هنا أجيب لهم ورد" وقال في النهاية بقلب حزين "ربنا سبحانه وتعالى يرحمهم بس حقهم رجع لهم".

عند أكبر لوحة تحمل أسامى الشباب الشهداء، اتكلمنا مع إسلام على الصافطي، اللي كان بيكتب أساميهم، سألناه الموضوع بدأ واتنفذ إزاى؟ قال لنا "إحنا كل يوم بالليل نعمل تجمعات وحلقات عشان نقترح على بعض أفكار، وأهالي الشهداء بيجوا يقعدوا معانا عشان نقرر إزاى هنكرمهم في الميدان اللي استشهدوا فيه، بنجيب صورهم وفريق الفوتوشوب مسئول عن إنه يزيّن الصور"، وعن الفترة اللي أخدتها اللوحة قال "ما أعتقدش إنها أخدت فترة كبيرة لأن إحنا مجموعات، فيه ناس مسئولة عن تجميع المعلومات، وناس تانية مسئولة عن عملها، وعن تعليقها". وعن كيفية معرفة أسامي الشهداء، قال إسلام "بيجيبوا صور ليهم قبل وبعد الوفاة، وبيكونوا معروفين ومتكرمين فى البلد بتاعتهم، لأن المكتوبين من مصر كلها".

وعندما كاد الليل يسدل ستائره على الميدان، شفنا مجموعة شباب وبنات عاملين دروع بشرية، ولما سألنا مريم عبد الرحيم قالت: "عشان الشباب اتطوعوا وجابوا دهانات من مالهم الخاص، ودهنوا الرصيف، فلازم نعمل درع عشان نمنع الناس من المرور على الرصيف لحد ما ينشف، وكل ده عشان نورّى الناس إننا بنحافظ على بلدنا"، أما مها فقالت: "أنا حاسة بالفخر والنصر، وبقول للشهداء إنكم بدمائكم الطاهرة حررتوا البلد، وإحنا بعرقنا هنبنيها".

المكان غير المكان!!

المكان هو هو، الناس زى ما هى، المكاتب فى مكانها والكراسى ماتحركتش، كل شئ منظم ولا شئ غير مألوف موجود فى المكان، اذن فالمكان هو هو بلا تغير، لكن ايه سبب تغير احساسى تجاهه؟ حاسه انى غريبة عن المكان على الرغم ان هو ده المكان اللى فضلت طول عمرى احلم انى اكون فيه، جو سلام، شباب متعاونين، وكل حاجه "بييس" زى ما بيقولوا، إنما ايه اللى خلى كل ده يتغير جوايا؟ ايه اللى خلانى أحسن إنى غريبة عن المكان اللى أُكن له كل الاحترام والتقدير؟

يمكن السبب اسلوب تعامل الناس معايا بشكل جاف ولا مبالاه. هل بيعاملونى بالشكل ده عشان أنا لسه جديدة إلى حد ما بينهم، على الرغم إنى هناك معاهم من عدة شهور؟ مش عارفه ليه اسلوب التعامل بالشكل ده على الرغم إنى ما أذيتش ولا جرحت حد، على الأقل على حد علمى أنا، وأنا شخصياً ماعتقدش إنى أكون زعلت حد لأن همّا أصلا مش عاوزين يتعاملوا معايا ولا يعتبرونى واحدة من المكان، فليه همّا بالشكل ده؟!!

المكان ده اللى كنت بحبه جدا، دلوقتى بقيت كل ما افتركه أو أروحه الأقى نفسى مش قادرة أمسك دموعى!!

ارفع راسك فوق انت مصري

‎"ارفع راسك فوق انت مصرى" كل ما تتقال الجملة دى افتكر ناس لها النصيب الأكبر اللى

خلونا نرفع راسنا لفوق فعلا.. شباب مصر الشهداء .. أنتم بقلوبنا أحياء

ربنا يرحمهم جميعا يارب ويعنّا اننا نعمر البلد دى عشان فعلا مايكنش دمهم راح ع الفاضى

كان نفسى أكون معاهم...!

غداً اللقاء .. يا شهيد

المشاعر والأحاسيس جوايا متلغبطة على الآخر، خاصة لما الموضوع يكون عن شهداء الثورة اللى شالوا أرواحهم علىأكتافهم عشان يجى اليوم وأكتب الكلام ده..

مش عارفه أمسك الموضوع من أوله وعشان كده هكتب بعفوية خالص. الشباب اللى استشهدوا دول صورهم لا تفارقعينى، وتقريباً بنام كل يوم وأنا بفكر فيهم أعتقد لدرجة إنها وصلت إنى أشوفهم فى الأحلام. يا ترى لو كل واحد فينا شافهم فى حلمه، هيقولهم إيه؟ أنا شخصياً هكون ضعيفة وعاجزة عن الرد، إلا بجملة واحدة، كان نفسى أوى أكون معاكم!!

أيوة، كان نفسى أكون معاهم، مين فينا مايتمنّاش إن روحه تروح فدى بلاده وفى الآخر ينال الشهادة؟ كان نفسى أحصلهم عشان أقول لهم إحنا مش هننساكم أبداً، إحنا نلنّا حريتنا بفضلكم. إنتوا مش رمز لينا وبس، إنتوا وسام فخر على صدورنا.. وفى الوقت اللى نكون فيه بنفتخر بيكم وراسنا لفوق، هنكون فى نفس الوقت شايلين هموم ثقيلة كحمل الجبال على صدورنا، عشان نفضل نحافظ على دمائكم الطاهرة اللى نزفت من أجلنا، وعلشان نفضل شايفين أرواحكم الصافية وهى بتطوف حولينا.. وفى كل صباح تصبحوا علينا.. وتقولولنا حريتنا نلنّاها بإيدينا. همّا استعانوا بيك يارب وقالوا "اللهم أنت القوى فأعنّا بقوتك" حتى أصبحت قوتهم باستشهادهم.

بتخيل كم الشهداء اللى استشهدوا سواء من الشرطة أو من الشباب، بتخيل إحساسهم إيه بعد ما بلدنا باقت حرة؟ بتخيل همّا عوزين يقوللنا إيه؟ وياترى مشاعرهم وأشجانهم تجاه بلدهم عامله ازاى؟ ياترى وهمّا فى السما ووسط الملائكة شيفنّا وحاسين فعلا بالشباب اللى بيحبهم؟ ياترى شافوا التحية إلى أداها اللواء محسن الفنجرى على الشاشة أمام الملايين؟ ياترى شافوا اللوحة الكبيرة اللى اتعملت لهم فى ميدان التحرير والورد حولين صورهم؟ وكلنا كنّا بنشارك فى تنظيف اللوحة كل دقيقة عشان تكون نظيفة كما كانت أرواحهم؟ ياترى حسوا بجدران قلبي وهى بترتعش أثناء كتابة هذه السطور؟

نفسى أقول لخالد سعيد ولكل شهداء ثورة 25 يناير إن شباب مصر الشهداء بقلوبنا أحياء، ولو كنّا نملك أى شئ بجانب الدعاء نعطيه لكم ما كنّا ترددنا لحظة. أختم بقلمى، ولكن قلبي أبداً لن يختتم أشجانه لهم، بإن مهما عملنا علشان نرفع البلد دى للسما والسمو مش هنوفى تضحياتكم، ولا هنوفى دمعة فراق أسركم عليكم اللى كل ما تفتكر النصر، ينزلهم دمعة حزن وفرح فى وقت واحد...

STOP!! NO MOVE!!

قلبي مش عارف يبدأ منين وإيدى كل ما يمسك القلم يرجع ويسيبه، وكل ده عشان أنا جوايا حاجات كتير مش عارفه أولها أخرها، فحاسه إنى مش قادرة أكتب. المرة دى مش حساه بحزن عشان حاجه مزعلانى من هنا أو حاجه مديقانى من هناك، إنما عشان الأوضاع اللى أنا فيها، بمعنى تانى ، أنا متابعة كل اللى بيحصل فى مصر دلوقتى لكن مشاركتى كلها تقتصر فقط على مشاهدة الأخبار ولا تتجاوز أكثر من ذلك. تمنيت لو أنى لى دور أكبر من ذلك، وليس دور فقط يقتصر على متابعة الأخبار من على الجزيرة والدعاء للمتظاهرين اللى موجودين فى ميدان التحرير وفى مختلف محافظات مصر.

عدم نزولى ليس فقط بسبب خوف الأهل علىَّ، وإنما أيضاً بسبب الوظيفة التى يشغلها والدى، حيث تمنع وظيفته عنه وعن أسرته وعن أى قريب له سواء من قريب أو من بعيد أن يشارك فى أى نشاط سياسى أو الإنتماء إلى أى حزب أى كان. وعندما اقترحت على إحدى الصديقات أن أقوم بأشياء آخرى بدلا من المشاركة فى المظاهرات، وجدت أن تلك الأشياء أيضاً غير مصرحة لى، لأنه مثلها مثل المظاهرات ولو تم الكشف عنها والتحقيق معى ومعرفة الوظيفة التى يشغلها والدى، فهنا سيخسر والدى عمله "ولقمة عيشنا تنقطع" زى ما بيقولوا.

أنا مقدرة الموقف اللى أنا وأسرتى فيه، وبلا شك ان أى شئ له ميزة وعيب، فلو عيب هذا العمل يمنعنى من مشاركة هذا الشباب الجميل فى تغيير مستقبل مصر للأفضل، فهو أيضا بلا شك له ايجابيات، يمكن أبرزها إنى لم أخذ الثانوية العامة من هنا فى مصر، بل من الخارج، مما يعنى إنى هربت من "عنق الزجاجة" كما يطلقون عليها.

حزينة وببكى إنى جوايا طاقة محبوسة أو مكبوتة وكل ما تحاول تخرج، أنا غصب عنى لازم أمنعها من الخروج وأضغط عليها بأقصى ما لدى من قوة عشان "سفينة الأسرة" لا تغرق. يمكن بشارك بالدعاء بس ديما اعتقادى بيقول إن المشاركة بالدعاء من غير عمل يكون اسمه تواكل وليس توكل، مما يعنى أنه لن يأتى بنتيجة.

يمكن التدوينة دى تخفف ثقل الكلام الذى يحمله كاهلى ولو بقليل أو تقلل من الحمل البليغ الشبيه بالجبال الذى يحمله صدرى، الذى لا يجد مـُشارك له أو من يراعى هذا الحزن. المدونة هى الشئ الوحيد اللى يمكن بفرغ لها عن ما أحلمه بداخلى سواء من آمال وألام، ويمكن محدش من أفراد أمن الدولة "الأعزاء" أصلا يلاحظ أنه تم تدوين أى شئ يمس "أمن الوطن" و "استقرار الأمة" لأن المدونة بالكاد يكون لها قرأ يعدوا على كف اليد الواحد. ((وهى دى الميزة!!

أصلها ناقصة قمع!!

بصراحه بقى أنا مش عارفه ابدأ منين، لأن الحقيقة أنا جوايا كلاااااااااام ولا لبكره الصبح، وحزينة جداااا انى مش عارفه اقول الكلام ده لمين فقررت إنى أكتب فى مدونتى وأمرى لله

طبعا لا يخفى على أحد منكم حال البلد "بييس" خالص ازاى؟!! وان رأس البلد تحت ورجلها فوق، والدنيا مش على بعضها، وربنا يخليلنا الحكومة!!

الحمد لله الحكومة شغاله قمع للشباب على أفى مين يشيل، يعنى فى قمع سياسى لكل واحد بيحاول أو حتى نفسه إنه يشوف بلده حاجه حلوه، ده غير القمع الاجتماعى وبلاوى زرقا كتير. لكن بجد بقى اللى فعلا يزود الطين بله هو القمع الأسرى!!

قبل ما اقول بقى ايه هو القمع الأسرى واللى أكيد أغلب الشباب اللى فى سنى مش تايهيين عنه، عايزه اقول انى الحقيقة ماكنتش اتوقع إنه يجى على يوم وأكتب عن حاجه زى كده "ببليسى" يعنى بالبلدى زى ما بيقولوا اللى ما يشترى يتفرج.

القمع الأسرى عندى انا بقى ولا القمع اللى كان بيشوفه الهنود الحمر ايام ما أمريكا ظهرت على أفاها، خلى حياتى أنا أحمر وجحيم، كل ما أقلوهم حاجه الرد زى ما يكون "سيستم" و "اوتماتيك" لأ، بصرف النظر بقى عن المظاهرات اللى مخلية البلد فعلا مشرقة وان لسه فيها شباب، الـ لأ دى مش فى المظاهرات وبس لكن فى حاجات كتييييير اوى مش عارفه اعدها زى ما مابعرفش اعد حبات الرز اللى فى الطبق!!


مفيش حتى نقاش، وان هما بيدخلوا من الودن دى عشان يخرجوا من الودن دى، هما شايفين ان هما على طول صح وان عشان هما اكبر مننا سنا يبقى خلاص ضرورى ان كل الخبرات اللى لا تحصى تكون هى اللى على صواب ديما. قال يعنى مش بشر مثلا. وقبل ما حد والنبى يقول اصل دول اهل وبيخافوا علينا والوالدين مش عارفه ايه وكلام فكسان من النوع ده، انا هرد برد بسيط اوى، زى ما هما دورهم كأهل انهم يخافوا علينا ويربونا وما الى ذلك، هما كمان دورهم مش فى انهم يربونا عشان ناكل عيش وبس، انما يربونا ان احنا مانسكتش على الظلم. يربونا على اننا منخافش. مش هما يعدوا يقلولوا كلمتين حلوين عن كل واحد ياعينى بيضحى بنفسه عشان شئ أسمى وأعلى ويقولوا الله شوفوا، لازم نكون كده، ولما يجى اليوم ده، تلاقيهم بيقولوا لأ، احنا بقى مش كده، احنا بقى سلبيين، احنا بقى ووووو وكلام للصبح يطهق.


والمصيبة الأدهى انهم بيطلبوا منك انك حتى ماتعبرش عن رأيك ولا انك يكون لك رأى غير رأيهم، كل اللى هما عوزينه اننا نمشى وراهم ونقول آمين، ماينفعش حتى ان ولو ظاهريا _ ما هى كل حاجه ظاهريا حتى الديمقراطيه فى البلد دى يبان انه موجود ولكنه شئ ظاهرى بس _ تقول رأيك ويكون لك شخصية مستقلة بذاتها.


مع كل اللى بيحصل ده مالاقيتش نفسى بعمل حاجه غير انى ببكى، بل وبحرقه اوى، _طبعا هما مش هيهمهم حاجه زى كده وهيقولوا اتفلقى_ لانى حسيت انى محبوسه بين اربع جدران ومش عارفه اتحرك خاااالص. أنا والله عمرى ما هعامل ولادى بالشكل ده، هناقشهم وهسمع كلامهم كمان، لازم يكون فى حاجه اسمها حوار. والله الأسرة المصرية بشكل عام محتاجة يتعمل لها إعادة تأهيل من أول وجديد. آه والله. ماتستغربوش الكلام ده، لان الموضوع مش بسيط ولا يتمثل فقط فى ان هما بيقولوا ديما لأولادهم لأ وخلاص. محتاجين إعادة صياغة لمفاهيم كتير أوى، ومثال بسيط ازاى مثلا الأب أو الأم يعتذروا لولادهم، والله مش عيب، كده هو هيعتبرك صاحبه وهو اللى يجيى يحكى لك، لكن تقول لمين بقى، ومثال تانى ان هما شايفين ان مدام هما الأب والأم يبقى من حقهم يعملوا شغل الـ "سباى" او التجسس على ولادهم، يشوفوا الرسايل اللى بتيجى لولادهم، يفتحوا الموبيل، ووالله ده اسلوب خطأ تماماً لان كده بدل ما يجى يحلكيك، هيخبى عنك حاجات اكتر ومش هيعتبرك "المستشار" بتاعه.

انا شخصياً تعبت من الكلام، قصدى الكتابه بقى فى الحالة دى، بس بجد أختم بحاجه واحدة، ياريت الأهل يحاولوا ولو مرة انهم يفهموا ولادهم عشان مايخسروهمش.

وأخيراً وليس أخراً، ربنا يارب يعيننى إنى أعمل حاجه إيجابية لبلدى فى يوم ممن الأيام، وربنا معاكى يا بلدى _ ومعايا أنا كمان_.