!!زعلانة من نفسي وعلى نفسي

الموضوع جوا قلبي ملعبك جداً، بس فعلا زعلانة على نفسي بسبب البهدلة اللي المواطن المصري بيشوفه، والمرمطة في أي حاجه في حياته اليومية، سواء لو في مصلحة حكومية أو راكب مواصلات، أو في شغله/تعليميه.. بتصعب عليا نفسي وأنا المفروض من بني البشر لا نحيا حياة آدمية كما يفترض أن نعيشها. لكن في نفس الوقت زعلانه من نفسي لمّا بلاقي تفكيري نتيجة كل ما سبق هو الهجرة للخارج في دولة تـَعي معنى "تقدير الإنسان". إزاي أكون بتمنى كده والمفروض إن أنا عمري ما أحس بزعل تجاه "أنا كلمة يمكن عمرها عمر البشر ده عام بعام.."؟؟ إزاي نفسي أسيب "اسمي أعظم اسم.."؟؟ ازاي نفسي أسيب بلدي والمفروض إن كل واحد فيها يشتغل علشان يبنيها...؟


إزاي نفسي أسيب بلدي والمفترض إننا نكون بنجهز على قدم وساق ليوم الحسم مع "إسرائيل" من أجل استرداد حقنا في فلسطين، وحق صبرا وشتيلا، وحق محمد الدرة، وحق محمد البرعي وحقوق تانية كتير أوي لم نسترددها بعد؟! إزاي التناقض ده جوايا!!؟؟


إزاي وإحنا بنقول على نفسنا حضارة 7000 سنة مش عارفين نلم شوية زبالة في الشارع.. إزاي وإحنا بنقول على نفسنا حضارة 7000 سنة نلاقي شوية شباب "طايش" -إن جاز التعبير- بشوية موتوسيكلات يعملوا حركات فيعطلوا المرور ومصالح الناس، وإزاي وإزاي..؟؟؟!!! اترسخ جوايا إن العيب مش عيب نظام فحسب إنما عيب شعب، شعب مش عاوز يغيّر من ثقافته.. شعب بيدعي الحضارة ولكنه يفتقد أبسط مقومات تلك الحضارة... زعلانة من بلدي وفي نفس الوقت زعلانه على بلدي..


بدأت أصلح في بلدي من إن أنا أغير من نفسي.. من إن أنا أحاول ابني نفسي صح في مجال دراستي حالياً وعملي مستقبلاً، بس يعتصر قلبي ألماً لمّا أحاول أكلم الناس وأقول لهم لو سمحتوا الصح كذا، فيكون الرد "ببجاحة"ومنتهى في قلة الأدب.. ده بسبب إن الصح دلوقتي أصبح غلط والغلط هو اللي صح، ولو حد اتكلم يبقى فتح على نفسه أبواب عمره ما هيعرف يقفلها..


يا ترى وأنا بقول نفسي اهاجر بره مصر، دي حاجه تفرح إسرائيل؟ أنا إعتقادي آه.. بس أنا أعمل ايه.. أنا بني آدم وحقي أعيش حياة آدمية، لكن في نفس الوقت أنا مش عايزة أكون ثغرة لإسرائيل عشان تفرح فيا وفي بلدي!! يا ترى الحل فين؟؟!!!


ع الهامش: لا أقصد التذمر بشكل كبير كما قد يتبين للقارئ، فأنا أعلم جيداً أن حالي أفضل من ناس كتير، ولكن من أقصده أنه ليس من العيب أبداً أن يكون الفرد طموحاً.


ملحوظة: الكلمات الملونة هى مقتطفات من أغنية "أنا يا إسرائيل" لمغنيها المبدع حمزة نمرة...

خرابيش أقلام وثرثرة أفواه

علمتنى الحياة أنه لا راحةً لى أبداً في بلادي ، ولا في غربتي ، إنما تكمن الراحة الحقيقية عندما أنتقل إلى ربي ..!


كل منّا أحياناً يتمنى أن يكون له قلب غير القلب الذي يحمله بين ضلوع صدره..!

 
علمتنى الحياة .. أن لا صديق يدوم مهما كان قربه لك، إنما يظل الصديق الدائم هما الورقة والقلم ..!


كم هو قاسي أن يحتضنك صديق ومع ذلك تشعر بفراغ هذا الحضن..!


ندمتُ حقاً على ذلك اليوم الذى عرفتكِ فيه وبعثتُ إليكِ بهدية يوم مولدكِ. ليت الزمن يعود كي لا أُعيد خطئي وليت الأيام تمضي حتى أنسى حماقتي


أضمُ يدي على صدري بقوة حتى تكون نفسي مصدر دفئي وحناني، وكأنني بهذا أربت على قلبي الحزين.. قائلة له "لا تستكين"..!


غرباء في الدنيا غرباء.. فكُفي يا نفس عن البكاء.. فصراخكِ لم يجد له مسامع في الأصداء..!


كلنا منا يحتاج إلى الفضفضة وعندما يفضفض يعتقد أنه يثرثر في الحديث، في حين الواقع هو أن تلك الكلمات التى تخرج من أفواهنا تعتبر من أصدق ما نطقت به قلوبنا..!

 
مش عايزة حد يحس بيا.. حضرتك يارب كفاية عليا..!

أحباب القلوب ورفقاء الدروب

ما كان لعيني أن ترى الحياة بألوان زاهية لولا الأمل الذي يسكن القلوب..

ما كان لحياتي أن يكون لها معني سوى بوجود رفقاء الدروب..

نسطع سويا لأعالي القمم

ونكون ما ينبغي بين الأمم

نحقق سويا أحلامنا.. نحقق سويا طموحتنا.. فلولا تشبتنا.. ولولا تمساكنا.. ما كنا..

مهما طالت علينا الأبراج ومهما ألمت بنا الأشواك.. سنصبح أقوى.. سنصبح أسمى.. سنصبح أرقى..

فهما ضاقت علينا الصدور وأضعفتنا ما حولنا من عقول.. سنكافح لكي نكون لهم كالبنيان مرصوص.. ونصبح أمامهم كأعالي السدود..

الحياة أمامنا طويلة.. فـَنـُحيى سويا معاني جميلة.. وأصفاد رقيقة.. ونرسم على الوجوه إبتسامة بسيطة..

بحبك يارب

""بحبك يارب.. ومش عايزة حاجه من الدنيا دي غير حضرتك

يارب يوم ما أقول الكلمة دي أكون ديما صادقة فيها وقلبي يقولها قبل لساني.. وزي ما بقولها يارب من قلبي وأنا تعبانه.. يارب أقولها من أعماق قلبي وأنا مبسوطة

يارب خلي حبك في قلبي أعظم من أى حب آخر...

Life is rubbish!!

كله بيكدب على كله وعايشين في الدنيا نجرح ونتجرح...!

وبس كده...!!!

وانقطع الأتصال (2)...

وأنا جالسة على حاسوبي فجأة وجدت هاتفي يرن، حاولت التمعن في الرقم لعلي أستنتج من المتصل، ولأن الاسامي لم تعد تظهر في هتافي "الجديد" لأني عندما فقدت هاتفي "القديم" نتيجة استهتاري به في الشارع ودهسه من قبـّـل إحدى السيارات، فالعدّة الجديدة غير مسجل بها نصف الأرقام التي كانت موجودة في الهاتف الذى توفي عنه الكهرباء..

دققت النظر في الرقم، ولأنى أعرف أنها خارج مصر، استنتجت أن كود تلك الدولة يعود للبلد التي تقطن هى فيها الآن..

وما خاب ظني.. فوجدت حقا -بعد البحث في عمّنا جوجل- أن كود الرقم يعود لتلك الدولة، فأصرّتُ على عدم الإجابة..

سامحتها عما بدر منها من عدم صدقها معي ولكني فقط لا أريد الحديث معها.. حقاً لا أريد