Get Out Of My Mind

يارب أنا تايهه فارشدني

يارب .. أنا حاسه نفسي تايهة وعماله اخبط في جدران الحياة.
يارب .. أنا حاسه أنا مش عارفه أنا عايزة إيه
يارب.. اهديني للطريق اللي تحبه ونور بصيرتي لمرادك منى

* * *

يارب اجبر بخاطري في صحبتي

* * *

مدونتي .. مفتقداكِ بشدة.. نفسي أعرف ارجع اكلمِك زي زمان.. لما بفتحك من كتر حبي ليكِ بحس إني عايزة أحضن الكمبيوتر (إحساس يبدو ساذجًا)

نفسي في إيه قبل ما أموت

نفسي قبل ما أموت فـي الآتي:
- اتمشى لوحدي ف الشوارع قبل الفجر بلا هدف وبلا وجهة ثم أصلي في المسجد اللي يقابلني ثم أعود ماشية لبيتنا وأنام وأنا حاسه بنشوة.
- يبقى عندي دولفين وحصان.
- اوصل لدرجة اليقين التام والسلام النفسي.
- اشتغل مصورة صحفية لرويترز أو مراسلة صحفية في دول العالم.
- اعمل عمرة وازور النبي اوي.
- اتعلم الرسم.
- اتعلم بيانو.
- اسافر دولة افريقية واساعد الغلابة اللي هناك.
- اصلي في المسجد الأقصى وأشوف صديقة ليا في غزة.
- أنط من قمة عالية واتسلق جبال مرتفعة. 
  - أرجع ألعب الرياضة اللي كنت بمارسها وأدخل الألومبياد زي ما كنت بتمنى.

يارب ماتسبنيش .. أنا بحبك ومن غيرك ما أساويش

..إن ضاقت بى الدنيا فليس لى سواك أدعوه
..إن ضاق على صدرى فليس لى سواك أرجوه
إن ضاقت على الأرض بمارحبت فليس لى سواك أسجد على أرضه أتوسل إليه..
يارب.. يارب سامحينى إنى ببعد عن حضرتك كتير .. وكل مرة أرجع فيها أقول أنا مش ناويه أسيبك تانى .. لكن الدنيا تيجى تاخدنى وأحس إنى إنسان أنانى
يارب .. يارب خلى قلبي مليان بحبك عشان يقدر يشوف كل حاجه فى الدنيا بعيون ايجابية
يارب حضرتك الوحيد اللى عارف ايه اللى مزعلنى .. فيارب زى ما الضيق ده جويا .. أعنى إنى أقدر أواجهه
يارب .. يارب الدنيا قاسية عليا وأنا قلبي ضعيف.. فيارب قويه عشان يقدر يستحمل كل حاجه وأى حاجه بتتعبه
يارب أنا مكسوفة من حضرتك إنى أكون كل شوية ببعد عنك ومع ذلك بكون طمعانة فى كرم حضرتك وطلباتى من حضرتك .. يارب اهديلى قلبي
يارب ماتسبنيش .. أنا بحبك ومن غيرك ما أساويش

ياه لمّا الحلم

by ~moffad @ deviantart.com

ياااه لمّا حلم أصلا ماكنش في خيالك تشوفه ولا حتى تكون جزء منه

فتلاقي كرم ربنا الواسع إنك تشوف الحلم بيتحقق وكمان بتشارك فيه

إزاي أشكرك يارب على النعمة دي وشكري لك نعمة تستوجب الشكر

الحمد لله حتى يبلغ الحمد منتهاه

لك الحمد حتى ترضى ولك الحمد إذا رضيت ولك الحمد بعد الرضى

ولا يعلم ما في القلب إلا الله!

مش عارفه المشكلة فيا ولا في الناس؟!

هل أنا اللي مش بعرف أتكلم صح ولا الناس هى اللي مش بتفهمني زي ما بقصد؟!

أنا مش بعرف أعبر ولا الناس بتفهم بالشقلوب؟!

تعبت من الموضوع ده وخاصة لما اجي على نفسي عشان الآخرين فيعتقدوا إني بفعله لغرض ما غير طيب

* * * *

* صورة تمثل لي الكثير، فاليوم كنتُ مثل هذا الكائن الذي لا يتحرك من على ضفة البحر، شاردة في غموض البحر الذي لا يتضح معالمه مع لون السماء الداكن في الشتاء القارص، أربت على قلبي تارة بتذكر حدث يسعدني، وتارة آخرى أمسح دموع عيني بيدي عندما أتذكر ما يؤلمني.   

 اكلم نفسي واكلم ربي، وربي وحده يعلم أدق التفاصيل وكل ما يجول في خاطري وقلبي، ووحده المولى يعلم ما وراء القصد، فإذا كنت أقصد خيرا فليس جزاء الإحسان إلا الإحسان (يارب ارزقني اليقين بده)، وإن كنت أقصد شرا فليجازيني الله عما أفعله من سوء مع الآخرين.

ولكن تبقى النية مقرها القلب، ولا يعلم ما في القلب إلا الله!