ماتتعلقيش بحد !

خلي قلبي كأنه مافيش 
يا ربـ ~

شوية حاجات ليهم علاقة ببعض

امتى اتخلص من مشكلتي مع النوم واكون زي باقي البشر من غير ما لازم كل يوم تقريبا قبل النوم افضل صاحيه ساعة ع السرير مش بعمل حاجه غير اني بفكر في كل حاجه واي حاجه وصراعات ذاتيه تشتغل #وجع دماغ


ليه الأم والأب الشرقين ماعندهمش ثقافة الاعتذار .. يعلّموا ولادهم كويس اوى انهم يحترموهم ويعتذروا سواء غلطوا او ماغلطتوش .. لكن هما يقولوا ولو كلمة "معلش" يجبروا بيها بخاطر العيل مش واردة في قاموسهم #ثقافة رجعية

نتيجة كل ده أصبحت ما انا عليه الآن #يارب خذني اليك روحا


بسبب ده .. ده بقى لازم ديما يكون جنبي #العياط والمناديل


كنت بدعي يارب ما اروحش البيت سليمة يومها #سامحني يارب


لا عايزة أعيش في بيت أهلي ولا عايزة أعيش في بيت جوزي..عايزه أعيش عند ربنا #أحيانًا 


يوم عالمي بكل ما تحمله الكلمة من معنى.. ازاي يوم يتجمع فيه قمة الحزن وقمة السعادة في وقت واحد.. بحاول اجبر نفسي اني مافتكرش غير الشق السعيد بس بلاقي نفسي بفتكر الشق الحزين خاصة انه حصل الأول.. عايزه اليوم ده يتمحي وفي نفس الوقت لأ #الموضوع مكلكع وهيفضل مكلكع

ليه هى مابتزعلش على زعلي زي ما بزعل أنا على زعلها.. ليه بتزعل من زعلي؟ #غير الإنصاف 

شوية حاجات ملهمش علاقة ببعض

يارب سامحني قبل ما أجيلك #يارب

أد إيه إحساس حلو إنك في السجود تحكي لربنا كل حاجه؟! #يارب

بهرب من نفسي ليك #يارب   

عايزة أرحم نفسي من نفسي #تخاريف

reminder: الحل هو الضبة والمفتاح فخليكِ فاكرة ده

فترة وهتعدي #سذاجة

قطعت على نفسي عهدين صعبين ويمكن يكونوا مش صح بس هما مش غلط بس ان شاء الله هثبت عليهم #كلاكيع

تقريبًا مش عيب لو ظهر الجزء الضعيف من شخصيتي ادام حد #مش متأكدة

لازم أكون قوية قدام الناس حتى لو أنا حاسه من جوايا إني أضعف ما يكون

في حاجات لازم تفضل سر بينك وبين ربنا

كنت فاكرة ان الورقة والقلم يقدروا يحتوا كل حاجه جوايا بس  حاجه زي دي مش بكتبها في ورقي عشان ماتقعش ولو بالصدفة في ايد حد.. حتى لو هموت وأكتبها عشان أريح نفسي شوية #القاع المظلم

عدى فيا الحزن غيرني، حزن يا محوّل خطوط سيري #سيرة الأراجوز

يطرح إيه الملح غير مالح، يطلع إيه م الجرح غير مجروح  #سيرة الأراجوز

كل ما بقف في المطبخ كل ما بكره الجواز أكتر !

أحيانًا بحس إني محتاجة أي شئ يربت على كتفي ولو حتى قطرة مطر بس كبريائي يمنعني   

عندي أمل ولو حتى ضئيل جدا إني في يوم من الأيام هوصل لدرجة اليقين التام والسلام النفسي الكامل #بتمنى

* غالبًا ليهم علاقة ببعض

Get Out Of My Mind

يارب أنا تايهه فارشدني

يارب .. أنا حاسه نفسي تايهة وعماله اخبط في جدران الحياة.
يارب .. أنا حاسه أنا مش عارفه أنا عايزة إيه
يارب.. اهديني للطريق اللي تحبه ونور بصيرتي لمرادك منى

* * *

يارب اجبر بخاطري في صحبتي

* * *

مدونتي .. مفتقداكِ بشدة.. نفسي أعرف ارجع اكلمِك زي زمان.. لما بفتحك من كتر حبي ليكِ بحس إني عايزة أحضن الكمبيوتر (إحساس يبدو ساذجًا)

نفسي في إيه قبل ما أموت

نفسي قبل ما أموت فـي الآتي:
- اتمشى لوحدي ف الشوارع قبل الفجر بلا هدف وبلا وجهة ثم أصلي في المسجد اللي يقابلني ثم أعود ماشية لبيتنا وأنام وأنا حاسه بنشوة.
- يبقى عندي دولفين وحصان.
- اوصل لدرجة اليقين التام والسلام النفسي.
- اشتغل مصورة صحفية لرويترز أو مراسلة صحفية في دول العالم.
- اعمل عمرة وازور النبي اوي.
- اتعلم الرسم.
- اتعلم بيانو.
- اسافر دولة افريقية واساعد الغلابة اللي هناك.
- اصلي في المسجد الأقصى وأشوف صديقة ليا في غزة.
- أنط من قمة عالية واتسلق جبال مرتفعة. 
  - أرجع ألعب الرياضة اللي كنت بمارسها وأدخل الألومبياد زي ما كنت بتمنى.